新手煮婦-烤法國黃油春雞

第一年同屋企人係自己屋企聖誕聚餐，當然要親自下廚幾樣吧！

聖誕節食火雞就係人都知，但火雞太大且家中又沒焗爐，最緊要是我這個新手都未必處理到隻火雞，於是乎就買了隻春雞試試看！

其實我都係第一次整，參考了鬼嫁大師的食譜，再自己隨意加減下，不過因為我家沒焗爐，只有微波燒烤爐！火力不夠，攪到隻春雞好難先熟透...anyway.有焗爐就應該會好成功啦！

講下點整先....

》材料：法國春雞 1隻

百里香 （我在超市買新鮮一包）

Rosemary 迷迭香 （可用新鮮/乾，但因我有乾的，就好趁此機會清下貨）

牛油

鹽

配料：我用了洋蔥、紫洋蔥、啡磨菇

》做法：

1）解凍雞至室溫，洗淨，抺乾

2）百里香4棵，連迷迭香切碎，混和牛油（約15G) 成汁待用

3）慢慢掀開雞頸皮，將（2）塗抹於雞皮與雞肉中間，此步驟要小心整穿雞皮！我用LC矽膠刮+手指慢慢整都ok，

4）將另外幾棵無切碎的百里香，迷迭香塞入雞胸內，小小鹽

5）雞身外我塗抹埋用剩的（2），再塗抹了小小老抽等佢上色

6）配菜洗淨切好放側邊

7）如果想焗完隻雞個形靚啲，可以用食用專用既棉繩將雞縛好（我見我隻雞一開時都縛好左，所以我跟返佢縛好，圖中落下眼力睇睇）

8）食譜就話預熱焗爐200度，焗20分鐘；但我無焗爐，就咁用烤爐20分鐘係未熟既...斷斷續續都烤左好耐下先攪得掂😓

*雞翼尖易燶，可用錫紙包好！（圖中都未拆走錫紙）

*中途可目測雞的顏色變化，如驚個皮太燶可用錫紙蓋住

大功告成！睇得又食得既節日菜！

新手煮婦-蒜蓉豆豉帶子豆腐豆卜

很久無update blog喇！因為呢排工作太累人，煮飯都是煮輕便易煮的！

早前買蛋換了盒蒸煮豆腐，就已經盤算整呢個餸！今晚終於第一次整！

我除左蒸豆腐，驚唔夠食就買埋豆卜！好正呀！

材料：

急凍帶子4粒

蒸煮豆腐1盒（細size)

豆卜約8粒

蔥花適量

汁：

豆豉適量

蒜蓉約大半個（我用獨子蒜）

麻油少量

老抽適量

生粉1匙（以糖鹽盒內既匙份量，唔識單位哈哈）

鹽少許

糖1匙

做法：

急凍帶子解凍，一開半，印乾水份

豆腐一開八，放於碟中，

豆卜按需要切開細件，

洗洗豆豉，手剁好蒜蓉豆豉，連同汁內的份量拌好

把汁淋於豆腐帶子面上，

隔水蒸約7分鐘，

灑上蔥花，完成！

（如有過多水份可隔掉）

新手煮夫-檸檬薏米水

放暑假去了旅行，回來後也一直少下廚！夏日炎炎，見到好多人都整檸檬薏米水消下暑，我又買左包生熟薏米返去（放暑假前已買了）

擺左一排都未整，昨天買了檸檬就醒起可以整啦！

諗住放工回家整，點知老公下午已經整好左！所以呢篇係新手煮夫才對！

材料：生熟薏米一包，有埋熟薏米無咁寒涼

檸檬兩個

冰糖（自行調味）

水：2.5L

做法：

1）洗淨生熟薏米，浸生薏米一小時（老公唔識分，連熟既都浸埋）

2）煲滾水，水滾後落生熟薏米，收小火煲45分鐘

3）檸檬洗淨，刨出黃色皮，千萬不要白色部分（會苦）

4）將檸檬肉去白色衣、核，只要肉，切粒

5）煲好薏米後變米白色後就放冰糖及檸檬肉落去，不用煲太耐，因檸檬耐得滯會失去維他命。糖可先放少少，唔夠甜再加。

完成！

（呢個方法好複雜咁，不過又好好味喎！有啲檸檬皮食下，好似柚子蜜個啲咁，又唔會苦，非常好！）

新手煮婦-焦糖醬燒丸子、金銀蛋浸菠菜

這道好看又美味的焦糖醬燒丸子是我跟台灣網絡紅人陳泱瑾學了！

第一次就成功，我稍微整理一下自己的做法。

材料：1）$15免治豬肉（我買了半肥瘦），弄出來有七顆！

2）白芝麻少量

做法：1）先把免治豬肉加入少許鹽及米酒（不加米酒也可）

2）捏成丸子狀，（之後我把它們放入雪櫃，感覺上較為挺身點）

3）把丸子煎熟，盛起

4）小火煮熔砂糖（用了2包茶餐廳那些，我覺得多一點也可），熔掉就立刻加入少許醬油及米酒

5）把丸子加入去一起燴一會就好，太耐糖會燶掉哦！

6）最後灑上炒過/烘過的白芝麻，完成！

金銀蛋浸菠菜

材料：菠菜、皮蛋1隻、咸蛋1隻、蒜5粒、薑2片、雞湯約半碗/最細包裝

做法：1）洗淨菠菜，切段

2）咸蛋蒸/烚熟，切丁；皮蛋切丁

3）爆香蒜頭薑片，炒熟菠菜，盛起

4）加入雞湯，金銀蛋約煮一分鐘，加少胡椒粉

5）把湯及金銀蛋倒入菜中，加少許麻油

新手煮婦 - 煙肉藜麥夏日沙律

今晚老公帶隊，自己弄了個心機菜，其實整沙律都好多工夫，太寡又唔好食，雖然每樣都好簡單，但都係要時間囉！

煙肉藜麥夏日沙律：

材料如下圖，蕃茄、紫洋蔥（1/3個）、橙、蘆筍、藜麥、煙肉

沙律汁：檸檬汁（自行調較酸度，約1/2個都得）、初榨橄欖油、黑椒、鹽、糖

做法：1）藜麥1/2杯（米杯），落約1杯多啲水煲滾至發大及收乾水（我初初落左唔夠一杯水，收唒水都煲未得所以我隨意又加水落去再煲），盛起待涼

2）煙肉放烤爐烤10分鐘

3）蘆筍灼熟，待涼

4）煲緊藜麥個啲時間就可以切蕃茄、橙、紫洋蔥

5）加入沙律汁，攪掂！

新手煮婦-沒有乾煸四季豆、三杯豆腐煲

乾煸四季豆我一向都幾鍾意食，不過出面食要走油，係屋企煮除了想健康啲當然也嫌麻煩啦！所以呢個係沒有乾煸的四季豆哦！（四季豆會硬啲脆啲）

材料：四季豆一紮（約一斤）、紅椒、蔥、薑

肉碎$20（其實$15也可，我煮3人份量但都食剩）

醃肉：糖、豉油、麻油、水、鷹栗粉等

做法：1）先爆香蔥薑（可加蒜、我加唒落個豆腐煲到無唒，哈哈）

2）下肉碎，炒炒炒

3）加入四季豆，中大火繼續炒至熟

4）自行加入調味、紅椒

大功告成！

三杯豆腐煲(賣相麻麻，但好好食架！）

本小姐都幾鍾意食豆腐，叫個三杯煮法好似好美味當然要試下！

材料：硬豆腐2磚（3人份）、乾蔥4-5粒、蔥段、蒜頭4-5粒、薑片數塊、九層塔

醬汁：水120ml、醬油、米酒、糖

做法：1）先煎豆腐兩面至金黃色，中途我加了些鹽調下味

2）麻油爆香乾蔥、薑、蒜頭、蔥段

3）加入豆腐及醬汁，蓋上蓋細火炆煮至收汁

4）加入九層塔拌勻

Yum yum ....！

連啲乾蔥吸唒啲汁都好好食！

新手煮婦-泰式豬頸肉、涼拌佛掌瓜

星期六晚有心機煮多啲，今次見人地食譜整佛掌瓜，以前媽媽整都係切到一舊舊炒多，今次見到有唔同做法我又試下整！效果也不錯哦！豬頸肉就係我老公欽點既！

泰式豬頸肉：做法極為簡單，醃左擺入烤爐上下兩面各10分鐘左右就是了！反而要自調個泰式汁！

材料：急凍豬頸肉3塊

醃料：老抽、頭抽、味霖、糖、麻油等等（我醃了至少一小時）

汁：青檸一個、魚露、蒜蓉、指天椒

完成後黎個斜切就好靚啦！下次會再整靚啲😎

涼拌佛掌瓜：

材料：佛掌瓜一個

醃料：白醋、鹽、麻油、味霖、紅辣椒（我見食譜再加埋韓國辣椒粉，但我唔食辣無加）

1）佛掌瓜先去皮（第一次整發現去皮後既佛掌瓜會有啲奇怪物質，攪到我隻手勁乾，甩唒皮！整完狂搽hand cream😓)

2)去皮後切絲，用鹽麴/鹽醃，雪凍30分鐘，旨在出水

3）30分鐘後倒掉佛掌瓜的水，用水清洗乾淨及洗走啲鹽

4）我見佛掌瓜可以生食，但我又未試過生吃，所以我炒幾炒先，待涼

5）加入醃料雪凍30分鐘

咁就完成一道微酸的涼拌菜了！

新手煮婦-夏日冬蔭公梳打

夏天熱辣辣，最好就係飲啲凍冰冰既野！

呢個冬蔭公梳打是在鬼嫁食譜看到的！比起青檸梳打特別啲，又會辣辣地！不過我又是沒跟足原著，沒下鹽及泰國青檸呢！份量亦都只是整了一支梳打，唔夠喉呢！

材料：超市買的冬蔭公包已經有齊所需材料呢！不過通常只得一個青檸，要自己再買！

1樽梳打水份量：青檸2個（1個切片，1個榨汁）、香茅1支、檸檬葉3片、辣椒1隻、南薑3-5片、梳打水一支、糖水/糖漿

做法：洗淨材料，香茅切段，薑切片、檸檬葉手撕小片，然後將所有材料舂下出味

再加入梳打水，加糖漿/糖水。

*辣度自行調較

*無糖漿，用少量熱水溶左啲糖變糖水，待涼加入。

梳打水在街市泰國鋪買的！

新手煮婦-泰式粉絲蝦煲

放假有心機整新菜式，就試試跟鬼嫁食譜整呢個「泰式粉絲蝦煲」！不過唔係跟足唒食譜，自己又改下咁！
材料：蝦、煙肉/五花腩、泰國粉絲（用普通粉絲也行，泰國粉絲口感較好）、蒜頭、薑、芫莤
醬汁：生抽、老抽、紹興酒、糖、水、麻油
做法：1）先把材料洗淨，蝦剪掉蝦鬚、頭部尖位，印乾蝦，把蝦浸在醬汁內
2）煙肉切片，薑切5-6片、芫莤要分2部分（根部及葉），我用左獨子蒜3粒
3）把煙肉鋪在煲內最底層，之後放薑片
4）芫莤根部及半份蒜頭舂出味，放在薑片上，落黑胡椒
5）鋪上粉絲
6）鋪上蝦、最頂層放芫莤葉，指天椒
7）蓋上蓋，中火煲3分鐘，慢火15分鐘，熄火焗5分鐘
完成！最後混合一起就大功告成！如果醬汁未收乾可以再中火滾一陣，但也要預計粉絲會吸水

新手煮婦-西檸雞扒

西檸雞是其中一樣位列高位的小炒菜式，酸酸甜甜很好吃！

自家制決定不炸，只煎，較為健康又不用太多油！

最初擔心個汁唔好味，但原來又唔係好難呢！

第一次整也能成功，滿足感加分！

材料：雞扒2塊

檸檬：1個

醬汁：白醋1湯匙、糖6湯匙、鹽適量、水約3/4杯

做法：雞扒預先解凍，用醃料（糖、頭抽、米酒、老抽等等）醃雞扒約15-30分鐘

燒熱鑊，煎香雞扒，盛起待用

檸檬片略煎，雞扒回鑊，加入汁料，滾起後埋芡至杰身便完成。

新手煮婦-日式秋葵

秋葵可算是我最喜愛的食物之一呀！美味方便健康！又可以用不同的方式煮！

今趟來個日式版秋葵！

做法：先洗淨秋葵，滾起水，下秋葵灼2-3分鐘就可以！（太軟身不好吃哦！）

之後如果想爽脆些可浸冰水！抹乾，加日式醬油，上面鋪上柴魚乾就得！幾快！
*選取秋葵時不要選一些太大條，太大條的會老！

新手煮婦-可樂雞翼

以前一直都好想食下可樂雞翼係點，哈哈！

今次終於試下整喇！

雞翼先飛水，我用跑活水方式，即是凍水落，小火滾至剛剛滾水前就拿起雞翼！

之後我再醃下佢地（其實唔醃都可以，不過因為有好多時間就醃下啦），

爆香薑及蔥段，將雞翼煎至兩面金黃，落汁料（200ml紅色coke,豉油，老抽，味琳）

用慢火炆20分鐘至汁收到差不多！

新手煮婦-咸蛋苦瓜

之前見到有食譜整，喜歡吃黃金蝦之類的我當然要試下啦！

我買左白苦瓜（其實係街市呀姐sell我咁我又試下）！

材料：2隻咸蛋（費是咁多）、1條苦瓜、蔥粒、蒜粒

做法：先洗淨苦瓜除去囊，切片（如下圖），今次我將佢出水先

之後切碎粒咸蛋，蛋黃整碎

熱鑊下油，下蛋黃炒至起泡，下苦瓜炒熟，如想軟身啲可加些微水，再下咸蛋炒勻，加適量糖就可！

新手煮婦-蕃茄薯仔蛋、薑蔥雞翼

前幾晚老公早收，幫我買埋送，洗埋切埋，煲落飯，一返到去就可以煮飯，太好了！ 

蕃茄蛋是一道簡單方便又好味的餸，不過我鍾意加埋薯仔落去，仲好食！

材料》薯仔1個、蕃茄2-3個、蛋4隻（我煮3人份，老公帶飯）

做法》1）洗淨材料，薯仔可切粒/條（我喜歡切條多些）、蕃茄一開8、蛋發勻

2）下油，先煎香薯仔（按個人喜歡的軟硬度，我喜歡不太林），兩面金黃微燶，下些鹽調味，盛起備用。

3）下油，下蕃茄，煮到軟身及帶汁，如太大件可再切小一點，加糖。

4）倒蛋液，下糖，少量鹽，兜勻就成了

*蕃茄蛋要多糖先好食！起碼落左3-4茶匙糖！heehee...!

薑蔥雞翼：

材料》雞翼一磅、薑3-4片、蔥（蔥段及蔥粒）、蒜頭（我用獨子蒜一粒）、乾蔥一粒

醃料》鹽麴（頭抽可取代）、糖、生粉、麻油、米酒、老抽

調味》老抽、味醂

做法》1）雞翼解凍，洗淨，用醃料醃（我醃了一晚）

2）鍋子下油，油熱有煙下薑、蔥段、蒜頭、乾蔥爆香，炒2-3分鐘左右

3）下雞翼及醃雞翼剩餘的汁，炒下兜下

4）下調味，上蓋炆煮約15分鐘王醬汁收8成乾

5）下蔥粒，再焗一會，完成！

*我鍾忘細細隻的雞翼，好食啲架！

*用Lc煲食到尾都仲未凍，熱力傳透好好！

新手煮婦-烤茄盎、四季豆炒肉碎

星期一放工後都叫做仲有小小心情煮飯，一路搭車一路睇下煮咩送好，見到呢個幾得意，又可以用埋啲剩餘物資（芝士、洋蔥），所以就整呢個啦！而且買免治豬肉可以一雞兩味，整埋四季豆炒肉碎，送飯一流，正！

烤茄盎：材料》茄子一條、免治豬肉$20（用埋炒四季豆個到）、洋蔥半個（用埋炒四季豆）、芝士

做法：

1）先醃豬肉》豬肉醃料：我用左鹽麴，日本野黎，諗住試下，用頭抽也可）、味醂（米酒也可）、糖、麻油、老抽等等。醃約20分鐘。

2）另一邊洗淨茄子，切段，用小匙挖空茄子（不要挖穿，留1-2cm左右）如下下圖

3）洋蔥切粒、混合豬肉碎

4）把混合的豬肉釀在茄子內

5）隔水蒸5分鐘

6）拿出來，加芝士碎上面，入烤爐15分鐘左右（耐小小都得）

完成！

（個樣都幾靚，食落個茄子幾多汁，不過皮略為硬左啲啲，如果喜歡濃味可以烤時加點調味料）

 烤緊既時候就可以整這個了！

材料：剛才的豬肉碎洋蔥、四季豆

調味：蒜蓉豆豉醬、辣椒

先洗淨，切/搣掉豆的頭尾部，切粒

1）下油，爆香蒜蓉豆豉醬及蔥白，

2）下剩餘的「豬肉洋蔥混合物」，炒炒炒，炒至熟8成（我見炒炒下有水，都係用大火炒等乾身啲）

3）下四季豆，炒到熟就得了！如喜歡可加辣椒！

完成！快靚正！

新手煮婦-牛油果莎莎配墨西哥粟米片

之前見到網上食譜，所以又心思思想試下整！

最初在超市都唔識揀牛油果，連如何是熟/生也不懂分！唯有找網絡大神幫手吧！

在超市看到的也是很細個和看似不太靚又生，之後在街市看到有啲黑啲既林啲既就叫姐姐揀啲唔太熟又唔要生既比我，因為我怕熟到爛，入面就會黑色的！$25/3個（不知是平是貴呢？）

材料　：牛油果2個、蕃茄1個、乾蔥半粒、沙律用的橄欖油少許、胡椒粉少許、鹽少許、檸檬半個榨汁（食譜用青檸汁不過我以為屋企有原來無，故用檸檬）

做法：牛油果中間切一刀，當然切唔爛粒核，左右扭扭就可以一開二啦！熟了的牛油果很易開及去皮，用手搣就得！之後可切細粒

蕃茄去籽，切細粒

乾蔥切細粒

全混在一起下調味（可以自行試味調較呀！）、檸檬汁、橄欖油，搗勻，看你喜歡完全cream狀還是有口感而決定時間長短！我沒攪拌器用人手攪，之後雪凍就行！

*粟米片我用原味，City super 有售

新手煮婦-綜合水果茶（2人份）

好耐之前在外國興起的detox water, 好似好健康又好味咁！最重要係好靚！

於是今日又整黎玩下！

做法：我用左紅茶包，浸在熱水3-5分鐘，再把茶包拉幾次就掉左（主要想有小小茶味又唔太濃），之後再加室溫水待涼。

這時就可以準備生果了！其實可以有不同配搭，我就貪心點，咩都用啲！用左以下：

士多啤梨約4粒

藍莓約半盒

橙約1個

檸檬半個

青檸1個

薄荷葉約2棵

生果要洗淨，尤其士多啤梨要浸多幾次！檸檬和青檸我怕苦所以批左皮！橙當然也去皮。

藍莓及士多啤梨「中」碎一些好讓容易出味又有啲色水！

之後全部倒落水，雪三個小時，就成天然維他命水了

*要用密封的容器哦，密封才會出味

*由於detox water 是賣健康，沒加糖。不要以為是街上喝的水果茶味，其也是很淡的！

新手煮婦-香草芝士烤蕃茄

假日晚餐，來個懶人西餐吧！

香草雞是在超市買現成的，好方便！

做運動之前先做好水果茶雪凍，弄完晚餐就已經剛剛雪了三小時，剛剛好！（水果茶食譜可見另一篇文章！）

香草芝士蕃茄是因為家中有三個蕃茄未食就試試整埋來吃，很好吃呀！

做法：洗淨蕃茄，切去頂及底部（我切得深少少可看到籽的位置），在蕃茄頂部灑上乾Rosemary香草，加海鹽及黑胡椒，橫向唧bb沙律醬，灑上Parmesan 芝士碎，再直向唧沙律醬，入烤爐烤約20-25分鐘。

蕃茄烤到熱及林，做前菜好好味！

新手煮婦-自家製黑糖梅酒

早前睇到鬼嫁教整黑糖梅酒，我也來趁趁熱鬧先！

食譜除了糖的分量上有些微出入，其他做法也是跟足的哦！

材料:青梅2斤、清酒1.8L、單晶冰糖400g,黑糖約150g(之前買左包無乜用，趁今次用下佢，但呢包不是粉狀，所以要自己整碎😭）

玻璃瓶用3L的！

做法：洗淨玻璃瓶，用清酒抹抹玻璃瓶內清毒，待乾。
 把青梅去芮洗淨，再在每個青梅上督4-5個小孔，待乾。
然後青梅同糖相間地放入樽內，再注入清酒，關好瓶蓋，
鬼嫁指釀半年至1年！我打算半年再看看情況再決定啊！
希望成功吧！

新手煮婦-復活羊架

第一次挑戰羊架，也本著大不了失敗的打算，因為沒有焗爐，用烤爐不知火力應如何控制，全部都是自己靠估同目測而成，最後都是over左，下次可以再努力！

羊架是之前在759購買的，見住在我家已一段時間決定在假日時處理他！

先準備好副食材先：蘿蔔、薯仔、洋蔥、大磨菇

羊架先去掉皮，因為最「蘇」的其實是肥膏，並不是肉呀！

用Rosemary、海鹽、醃羊用的香料、牛油、橄欖油把羊架外內塗抹好，醃約10分鐘。

配菜加橄欖油、黑胡椒、海鹽拌勻

之後把配菜放在烤盤，羊架再放試上面，放入烤爐烤約30分鐘，當中要翻身再翻身呀！

配菜方面，由於我發現烤完薯仔蘿蔔都不太林，所以我再連埋個烤盤一齊用明火再煮多左十分鐘。

同時間，我將羊架放在鐵架上用錫紙包住等佢，佢啲血水會出黎，待10分鐘後就切開喇！不過今次太熟，下次要再試下！

其實個樣都幾靚丫！

新手煮婦-咖哩蔬菜、洋蔥雞扒

每天放工都夜，放工最好就是簡單煮！所以用現成野也是走不掉的喇！
這個咖哩蔬菜就是把蔬菜都灼熟然後把汁混起來吧！
蔬菜當然可自行選用不同種類，我用了薯仔甘筍和秋葵，灼熟時間先後次序為》甘旬》薯仔粒》秋葵！然後把咖哩包放入滾水中滾1分鐘左右，就可以把汁倒起來了！

洋蔥雞扒》先醃好雞扒、煎香雞扒兩面金黃、再下醃雞扒汁加些少熱水、連洋蔥一起加蓋焗5分鐘左右，掀蓋如水少可再加，如是者焗15分鐘左右就得了！（我見食譜用25分鐘，但我15分鐘左右已經可以，可能與鑄鐵鍋有關，鎖水炆焗較快入味）

我淨係用左一塊雞扒，所以洋蔥多過雞扒，哈哈！

新手煮婦-泰式醉雞翼

之前整過醉雞翼，係網上目到好多人整泰式醉雞翼，咁我又整下啦！

材料：雞翼約1磅、香茅1-2支、青檸3個、乾蔥約3粒、紫洋蔥1個、糟鹵1支、糖

做法》先用數片薑、蔥連雞翼滾熟，約10-15分鐘（視乎雞翼大小），

雞翼熟後盛起即時放入冰水中，冷卻使皮肉收縮有彈性。

然後把乾蔥紫洋蔥切碎、香茅切段、青檸榨汁、加約一瓶糟鹵，落糖，自行調味，

把雞翼連汁料放在玻璃瓶內，汁要浸過雞翼，雪過夜就入味喇！

新手煮婦-苦瓜炒蛋、涼拌青瓜

我和老公也喜歡吃苦瓜，我特別鍾意食沖繩個種，連豆腐和午餐肉一吃炒，味道很好呀！（想一想又懷念沖繩了）

之前在街市買定了些瓜類放家，今天放工買多舊豆腐就可以立即開動！

做法》我用「雷公鑿」個種苦瓜，即是肥肥矮矮頭大身細那款。

先洗淨及切簿片、午餐肉切粒、豆腐乾切粒、蛋用了3隻（因為老公帶飯)。

先煎香午餐肉、加入豆乾煎下炒下，再加苦瓜炒至軟身。

中途我加過小小熱水，下調味糖鹽（糖下了較多，令苦瓜無咁苦）。

最後就加入蛋漿，炒炒炒，咁就大功告成！

呢個餸顏色配搭幾靚！

涼拌青瓜》呢個其實我都係試下，因為之前整過但我覺得唔太好吃，今晚見有條青瓜又再試多次！

青瓜我用保鮮袋裝起，下少量鹽醃下，放入雪櫃，雪左約15分鐘都唔見有太多水出來（在網上食譜看過用鹽麴醃，不過我無，所以諗住用鹽，可能失敗左）

個汁我加了鎮江醋、減鹽醬油、麻油、糖、辣椒、蒜頭。

之後將兩者mix埋又再醃左陣，就食得！

之前係不同餐廳都吃過小黃瓜，我覺得鼎泰豐的小黃瓜好好食，自己整真係差啲，遲些再研究下！

新手煮婦-椰皇鮮奶蛋白

之前睇到網上有不同的食譜教整椰皇燉蛋白，揀左一個來試！最難其實是開椰皇！哈哈！

上youtube學識點開，先用刀削平少少個尖位等可以倒轉放好，再用刀下面尖啄位鑿開下圖開口的位置，要小心，鑿岩位，鑿幾下就會開，再用刀撬開就可以了！不過我整過幾次，不同椰皇既難易度有些不同！望落去好厚個啲通常也難開！

做法》

大碗中加入椰水160ml，鮮奶120ml，糖2湯匙，蛋白四隻，拌匀

整盤過篩去蛋清

之後加入椰皇（椰皇可放小碗內以防跌倒），蓋上保鮮紙以防倒汗水，隔水中火蒸30分鐘。

新手煮婦-前牛扒配薯蓉

西餐最常出現的食物牛扒應該是其中一樣吧！

平時我也不是常常整，稱不得上百發百中，但上次le creuset開倉買了個坑紋grill pan，當然立即就要開動試試啦！看到有格格紋的牛扒真係食指大動！！而且呢塊是和牛，只是一般價格的貨，不是好好好貴個啲，但真係唔同啲！

做法：

格格牛扒》整前略用黑椒海鹽搽匀兩面。落油，熱pan，熱唒有些煙時可下牛扒，牛扒前方向10點位置，唔好郁塊扒，約煎1-2分鐘（視乎你喜歡的生熟程度及牛扒厚薄），可用鉗在肉上壓下令坑紋深啲，然後轉向2點方向（呢個時針法我都係參考鬼嫁學架！），同樣1-2分鐘。完成後用錫紙蓋一會讓血水流出。

薯蓉》先洗淨，刨皮，切件，落滾水中滾25分鐘左右。壓碎，加凍牛油，可逐小逐小加及攪拌，凍牛油可令薯蓉變瀑滑，再逐小加牛奶（千萬不要加太多，逐少加目測薯蓉狀態），個人為了不想太肥沒有加太多牛油，故不會是完全creamy狀態！最後加黑椒海鹽調味！

新手煮婦-冬蔭公炒飯

炒冷飯通常都是用食唔唒的食材炒埋一碟，今次我都是用前一日食剩的雞肉，再加午餐肉來炒，不過就試新野，加冬蔭公醬！效果比想像中好啊！
做法：下油（要多啲），落冷飯，炒一會，再加料（已忘記有無落蛋），加冬蔭公醬約2-3匙，炒匀便可。（可試味如太辣可加糖）

新手煮婦-芒果牛柳米紙卷

平時鍾意食米紙卷，所以放假又整下。因為想食芒果，所以買左個呂宋芒，好甜。家中有塊急凍牛扒，於是想起芒果配牛應該不錯吧！

先用海鹽，黑略醃將牛扒，再切條，下油煎牛扒，我想熟啲就煎3-5分鐘，之後用錫紙蓋著牛一會，如果有血水就會滲出來，待涼。

洗淨生菜，搣好一塊塊，去掉水份，待用。

芒果去皮切條，青瓜刨絲，加炸蒜，另有唐生菜。

預備一個深碟盛熟水，米紙浸一浸水拿出放在碟上，鋪上食材，卷起就成。

汁：魚露、糖、青檸汁、乾葱絲、辣椒

第一次整賣相麻麻，同餡料可以多些令個卷「豐滿」些，如加檬粉、三色椒等。

試過用一張米紙包較薄，兩張也可以！